ვფიქრობ, ეუთო/ოდირის ანგარიში იმას მოწმობს, რომ არჩევნების შედეგებთან დაკავშირებით კითხვის ნიშნების არსებობის არანაირი საფუძველი არ არსებობს, - ამის შესახებ საქართველოს საგარეო საქმეთა მინისტრმა, მაკა ბოჭორიშვილმა ეუთო/ოდირის საბოლოო დასკვნის შეფასებისას განაცხადა.

მისი თქმით, სიურპრიზი არ არის, რომ დასკვნაში ასახულია ის პოზიციები, რაც ფიქსირდებოდა თავად ოპოზიციის მხრიდან.

ბოჭორიშვილის განცხადებით, ოპოზიციის მიზანი იყო, რომ არჩევნების დისკრედიტაცია მოეხდინათ და შემდგომ არჩევნების შედეგებთან დაკავშირებით კითხვის ნიშანი დაესვა.

„გამოქვეყნდა ეუთო/ოდირის დასკვნა, რომელსაც ქართული საზოგადოება რამდენიმე კვირა თუ თვეა, ელოდა. ეუთო/ოდირის დასკვნა სრულყოფილად აფასებს წინასაარჩევნო გარემოს, შემდეგ უკვე არჩევნების დღესაც და არჩევნების შემდეგ პერიოდსაც. ძირითადად ის ემთხვევა იმ დებულებებს, რაც უკვე გაჟღერებული იყო ეუთო/ოდირის მიერ წინასწარ, როდესაც შეფასდა თავად არჩევნები, თუმცა ვხედავთ, რომ ამ დასკვნაში უფრო ფართოდ არის მოცემული ის რეკომენდაციები, რაც მიეცა ხელისუფლებას იმისათვის, რომ ვიმუშაოთ იმ ხარვეზების აღმოსაფხვრელად, რაც დაფიქსირდა არჩევნების პერიოდში. არჩევნებში მონაწილეობის შესაძლებლობა ყველას ჰქონდა. ეს ხაზგასმულია თავად დასკვნაში. თავად არჩევნების ორგანიზებაც პოზიტიურად არის შეფასებული. რა თქმა უნდა, არც სიურპრიზი არ არის და არც გასაკვირი, რომ მასში ასახულია ის პოზიციები, რაც ფიქსირდებოდა თავად ოპოზიციის მხრიდან. თქვენ კარგად გახსოვთ, თუ როგორო იყო წინასაარჩევნო და არჩევნების პერიოდი, ასევე, არჩევნების შემდეგი პერიოდი. ოპოზიციისთვის არასდროს ყოფილა მიზანი ამ არჩევნებში კეთილსინდისიერად მონაწილეობა და არჩევნების შედეგების აღიარება. მისი მოწოდებები მიმართული იყო სწორედ იქით, რომ არჩევნების დისკრედიტაცია მოეხდინათ და შემდგომ არჩევნების შედეგებთან დაკავშირებით დაესვათ კითხვის ნიშანი. თუმცა ვფიქრობ, ეს ანგარიში იმას მოწმობს, რომ არანაირი საფუძველი არ არსებობს, რომ ასეთი კითხვის ნიშნები არსებობდეს არჩევნების შედეგებთან დაკავშირებით," - განაცხადა ბოჭორიშვილმა „პირველ არხთან".