ინდონეზია BRICS-ის სრულუფლებიანი წევრი გახდა, - ამის შესახებ ინფორმაციას სააგენტო Reuters-ი ბრაზილიის მთავრობაზე დაყრდნობით ავრცელებს.

ბრაზილიის მთავრობის ცნობით, რომელიც წელს BRICS-ის თავმჯდომარე ქვეყანაა, ჯგუფის წევრმა ქვეყნებმა ინდონეზიის გაწევრიანებას მხარი ერთხმად დაუჭირეს.

„ინდონეზია, ჯგუფის სხვა წევრებთან ერთად, გლობალური მმართველი ინსტიტუტების რეფორმას მხარს უჭერს და გლობალურ სამხრეთში თანამშრომლობის გაღრმავებას ხელს უწყობს“, - განაცხადა ბრაზილიის მთავრობამ.

ინდონეზიის გარდა, BRICS-ი რუსეთს, ბრაზილიას, ინდოეთს, ჩინეთს, სამხრეთ აფრიკის რესპუბლიკას, ეგვიპტეს, ეთიოპიას, ირანსა და არაბთა გაერთიანებულ საამიროებს აერთიანებს.