მიუხედავად იმისა, რომ ძალიან ბევრი შეურაცხყოფა, შემოტევები იყო ფაშისტური ორგანიზაციების მხრიდან, ეს ადამიანები [მეწარმეები] ყველაფერს აკეთებდნენ იმისთვის, რომ საახალწლო სოფელს გამართულად ემუშავა - კიდევ ერთხელ ძალიან დიდი მადლობა მათ, - ამის შესახებ თბილისის მერმა, კახა კალაძემ დედაქალაქის მუნიციპალიტეტის მთავრობის წლის პირველ სხდომაზე განაცხადა.

კალაძის მტკიცებით, გასულ წელს მეწარმეების მხრიდან საახალწლო სოფელში მონაწილეობაზე „ძალიან დიდი მოთხოვნა იყო“.

„2025 წლის შობა-ახალი წლის სადღესასწაულო ღონისძიებები დასრულდა, რომელიც 25 დღის განმავლობაში დედაქალაქში სხვადასხვა ლოკაციაზე მიმდინარეობდა. მინდა გაწეული შრომისთვის მადლობა გადავუხადო მერიის თითოეულ თანამშრომელს, ყველა იმ ადამიანს, ვინც ამ დღესასწაულის შექმნაში თავისი წვლილი შეიტანა და მონაწილეობა მიიღო. განსაკუთრებული მადლობა ეკუთვნის ყველა კომპანიას, ვინც შესაბამის სამსახურებთან ერთად ჩართული იყო საახალწლო სოფლის ღონისძიებების ორგანიზებაში და განსაკუთრებული მადლობა მეწარმეებს, რომელთა გარეშეც საახალწლო ბაზარი წარმოუდგენელი იქნებოდა.

მიუხედავად იმისა, რომ ძალიან ბევრი შეურაცხყოფა, შემოტევები იყო ფაშისტური ორგანიზაციების მხრიდან, ეს ადამიანები ყველაფერს აკეთებდნენ იმისთვის, რომ საახალწლო სოფელს გამართულად ემუშავა და კიდევ ერთხელ ძალიან დიდი მადლობა მათ ეკუთვნის. რა თქმა უნდა, მეწარმეების მხრიდან ძალიან დიდი იყო მოთხოვნა. სამწუხაროდ, ჩვენ ყველა ვერ დავაკმაყოფილეთ, თუმცა გპირდებით, რომ მომავალი წლისთვის ჩვენი საშობაო-საახალწლო სივრცე კიდევ უფრო დიდი, მასშტაბური იქნება, სადაც შევეცდებით, რომ ყველა ადამიანს დავეხმაროთ, ყველა მეწარმეს ხელი შევუწყოთ და მივცეთ შესაძლებლობა, რომ საკუთარი პროდუქციის გაყიდვა საახალწლო სოფელში მოახერხოს“, - აღნიშნა კალაძემ.

გარდა ამისა, თბილისის მერის თქმით, საზოგადოების ნაწილის მხრიდან ქართველი შემსრულებლების მისამართითაც იყო ბულინგი, შეურაცხყოფები, „თუმცა მიუხედავად ამისა, ეს ადამიანები თბილისელების, ხალხის გვერდით დადგნენ“.

„მინდა მადლობა გადავუხადო ასევე არტისტებს, მსახიობებს, ბენდებს და ყველა ქართველ შემსრულებელს და შემოქმედებით ჯგუფს წარმატებული თანამშრომლობისთვის, ასევე მათი მისამართით იყო ძალიან დიდი ბულინგი, შეურაცხყოფები, თუმცა მიუხედავად ამისა, ეს ადამიანები თბილისელების, ხალხის გვერდით დადგნენ. რა თქმა უნდა, თავისი შემოქმედებით, სიმღერებით ჩვენი დედაქალაქი გაალამაზეს. მინდა მადლობა გადავუხადო თითოეულ მათგანს, ჩვენ რა თქმა უნდა, მზად ვართ მომავალშიც თანამშრომლობისთვის, მეგობრობისთვის, მხარდაჭერისთვის, დახმარებისთვის ნებისმიერ საკითხში, თემაზე. მუნიციპალიტეტის მხრიდან ყველას, თითოეულ თქვენგანს ექნება მაქსიმალური თანადგომა და მხარდაჭერა“, - განაცხადა კალაძემ.