აშშ-ის პრეზიდენტი, დონალდ ტრამპი იმედოვნებს, რომ რუსეთში დაკავებული აშშ-ის მოქალაქის, მარკ ვოგელის გათავისუფლება ომის დასრულების საკითხზე მოსკოვთან ახალი ურთიერთობის დასაწყისი იქნება, - ინფორმაციას CNN-ი ავრცელებს.

„რუსეთი ძალიან კარგად გვექცეოდა. იმედი მაქვს, რომ ეს არის ურთიერთობის დასაწყისი, რომლითაც ჩვენ შეგვიძლია დავასრულოთ ეს ომი და მილიონობით ადამიანის მკვლელობა შეწყდეს“, - აღნიშნა ტრამპმა.

ცნობისთვის, თეთრი სახლის ინფორმაციით, დონალდ ტრამპის ადმინისტრაციამ, გაცვლის შედეგად, ამერიკელი მასწავლებლის მარკ ფოგელის გათავისუფლება უზრუნველყო, რომელიც რუსეთში სამ წელზე მეტი ხნის განმავლობაში იყო დაკავებული. ეროვნული უსაფრთხოების საკითხებში დონალდ ტრამპის მრჩევლის, მაიკ უოლცის ინფორმაციით, გათავისუფლების შესახებ შეთანხმების მიღწევაზე მოლაპარაკება აწარმოვეს პრეზიდენტ დონალდ ტრამპის სპეციალურმა წარმომადგენელმა ახლო აღმოსავლეთში, სტივ ვიტკოფმა და პრეზიდენტის მრჩევლებმა.

ფოგელი მოსკოვის შერემეტიევოს აეროპორტში 2021 წლის აგვისტოში დააკავეს, 17 გრამი მარიხუანას გადატანისთვის ნარკოტიკების კონტრაბანდაში დაადანაშაულეს და თავისუფლების 14 წლით აღკვეთა მიუსაჯეს.