USAID-ი არაკომპეტენტური და კორუმპირებულია, - ამის შესახებ აშშ-ის პრეზიდენტმა, დონალდ ტრამპმა აშშ-ის მთავრობის ეფექტურობის დეპარტამენტის (DOGE) ხელმძღვანელთან, ილონ მასკთან ერთად გამართულ პრესკონფერენციაზე განაცხადა.

„USAID-ი ნამდვილად კორუმპირებულია, იგი არაკომპეტენტურია და კორუმპირებული“, - განაცხადა დონალდ ტრამპმა.

ილონ მასკის თქმით, USAID-ი „ზოგიერთ ღირსეულ საქმეს“ აკეთებს, თუმცა ძალიან ბევრს აკეთებს იმისთვის, რომ „არჩევნებზე გავლენა საეჭვო გზებით მოახდინოს“.

აშშ-ის პრეზიდენტმა, დონალდ ტრამპმა ფედერალური მოსამართლეები მისი აღმასრულებელი ბრძანებების დაბლოკვის გამო გააკრიტიკა.

„ჩვენ კორუფციის აღმოფხვრა გვინდა. ძნელი დასაჯერებელია, რომ მოსამართლეებს სურთ კორუფციის ძიებაში ხელი შეგვიშალონ. ასე რომ, ჩვენ მოსამართლეებს უნდა დავაკვირდეთ, ეს სერიოზული დარღვევაა“, - აღნიშნა აშშ-ის პრეზიდენტმა.

გუშინ, ფედერალურმა მოსამართლემ, ჯონ ბეიტსმა აშშ-ის ჯანდაცვის სააგენტოების ვებსაიტებზე იმ გვერდების აღდგენის ბრძანება გასცა, რომლებიც „გენდერული იდეოლოგიისა და ექსტრემიზმის შესახებ“ დონალდ ტრამპის აღმასრულებელი ბრძანების შესაბამისად წაშალეს.

აშშ-ის ყოფილი პრეზიდენტის, ჯორჯ ბუშის მიერ დანიშნული მოსამართლის გადაწყვეტილებას ილონ მასკი სოციალურ პლატფორმა X-ზე გამოეხმაურა.

„სულ მცირე, ჩვენ ამ უვარგისი იურისტის გათავისუფლება უნდა ვცადოთ. იდეა, რომ მოსამართლეს უვადოდ მუშაობა შეუძლია, მიუხედავად იმისა, რაც არ უნდა ცუდი იყოს მისი გადაწყვეტილებები, სასაცილოა!“ - დაწერა ილონ მასკმა.

ამასთან, გასულ კვირას მოსამართლე პოლ ენგელმაიერმა ილონ მასკის მთავრობის ეფექტურობის დეპარტამენტს აშშ-ის სახაზინო დეპარტამენტის სენსიტიურ ინფორმაციაზე წვდომა დაუბლოკა. მასკმა მოსამართლეს კორუმპირებული უწოდა, ხოლო აშშ-ის ვიცე-პრეზიდენტმა, ჯეი დი ვენსმა განაცხადა, რომ „მოსამართლეებს აღმასრულებელი ხელისუფლების ლეგიტიმური უფლებამოსილების გაკონტროლების უფლება არ აქვთ“.