ჩვენ არ განვიხილავთ აფხაზეთთან საჰაერო მიმოსვლის აღდგენას, როგორც საკითხს, რომელიც საქართველოსთან ჩვენი საჰაერო მიმოსვლის პრობლემებთან კავშირშია - ეს სრულიად დამოუკიდებელი თემაა, - ამის შესახებ რუსეთის ფედერაციის საგარეო საქმეთა მინისტრის მოადგილემ, მიხაილ გალუზინმა, რუსულ მედიასთან ინტერვიუში განაცხადა.

მისი თქმით, იმედოვნებს, რომ სოხუმის მიმართულებით ავიარეისები უახლოეს მომავალში დაიწყება.

„სოხუმის აეროპორტის რეკონსტრუქცია 2023 წელს დაიწყო და ამჟამად დასასრულს უახლოვდება. რუსეთიდან უკვე განხორციელდა სატესტო ფრენა. ვიმედოვნებთ, რომ რეგულარული რეისები მალე დაიწყება. ეს რუსების ძალიან დიდი რაოდენობისთვის აფხაზეთში ტურისტული, საქმიანი და ა.შ. მიზნებით ვიზიტს გააადვილებს. მოველი, რომ ქართული მხარე, თავისი პრაგმატიზმითა და რუსეთთან კავშირების მნიშვნელობის გაგებით, გააგრძელებს რუსეთ-საქართველოს თანამშრომლობის განვითარებას იქ, სადაც ეს ორივე ქვეყნისთვის სასარგებლოა. რუსეთის მხრიდან ეს განწყობა ყოველთვის არსებობს და საქართველოსთან ჩვენს თანამშრომლობას პოლიტიკურ ან ეკონომიკურ მოთხოვნებს არ ვუკავშირებთ. ძალიან დიდი იმედი მაქვს, რომ ამ საკითხში შენარჩუნდება პრაგმატიზმი და საღი აზრი, რომელიც დღეს აშკარად ჭარბობს თბილისში“, - აღნიშნა გალუზინმა.