ბრაზილიის პრეზიდენტი რომის პაპის დაკრძალვას დაესწრება, - ამის შესახებ ინფორმაციას სააგენტო Reuters-ი ბრაზილიის მთავრობაზე დაყრდნობით ავრცელებს.

„თარიღი ვატიკანის პროტოკოლზეა დამოკიდებული“, - განაცხადა ბრაზილიის მთავრობამ.

ბრაზილიის პრეზიდენტი, ლუის ინასიო ლულა და სილვა რომში პირველ ლედისთან, როსანჯელა ლულა და სილვასთან ერთად გაემგზავრება.

მანამდე აშშ-ის პრეზიდენტმა, დონალდ ტრამპმა განაცხადა, რომ რომში, პაპ ფრანცისკეს დაკრძალვას ისიც დაესწრება.

„მე და მელანია რომში, პაპ ფრანცისკეს დაკრძალვაზე მივემგზავრებით. იქ ყოფნას მოუთმენლად ველით!“, - დაწერა აშშ-ის პრეზიდენტმა, დონალდ ტრამპმა Truth Social-ზე.

შეგახსენებთ, რომის პაპი ფრანცისკე 21 აპრილს 88 წლის ასაკში გარდაიცვალა. ვატიკანის განცხადებით, პაპ ფრანცისკეს გარდაცვალების მიზეზი ინსულტი გახდა.

რომის პაპ ფრანცისკეს სანტა მარია მაჯორეს ბაზილიკაში დაკრძალავენ.