დასავლეთის ქვეყნები არ უნდა მოტყუვდნენ რუსეთის განზრახვებით, რადგან მოსკოვისთვის უკრაინა მხოლოდ ერთი ნაბიჯია დასავლეთისკენ მიმავალ გზაზე, - გამოცემა Deutsche Welle-ს ცნობით, ამის შესახებ გერმანიის ფედერალური დაზვერვის სამსახურის ხელმძღვანელმა, ბრუნო კალმა განაცხადა.

მისი თქმით, მოსკოვში არიან ადამიანები, რომლებსაც არ სჯერათ, რომ ნატო-ს ხელშეკრულების მე-5 მუხლი, რომელიც ურთიერთდაცვას გულისხმობს, რეალურად კვლავ მოქმედებს.

„მათ ამის გამოცდა სურთ. მათ სურთ, რომ ნატო იმ დონეზე დააბრუნონ, რა დონეზეც ის 1990-იანი წლების ბოლოს იყო. მათ სურთ, ამერიკა ევროპიდან გააძევონ და ამ მიზნის მისაღწევად ყველა საჭირო საშუალებას გამოიყენებენ“, - აღნიშნა გერმანიის ფედერალური დაზვერვის სამსახურის ხელმძღვანელმა.

მისი თქმით, ამისთვის რუსეთს არ სჭირდება მასშტაბური დაბომბვის განხორციელება ან სატანკო ქვედანაყოფების განლაგება და საკმარისია ესტონეთში „პატარა მწვანე კაცუნების“ გაგზავნა - ვითომდა დაჩაგრული რუსი უმცირესობის დასაცავად.

„შემდეგ კი მოსკოვი დააკვირდება, რეალურად გაგზავნის თუ არა აშშ-ის პრეზიდენტი ამერიკელ ჯარისკაცებს ატლანტის ოკეანის გადაღმა ამის საპასუხოდ“, აღნიშნა ბრუნო კალმა.

მისი თქმით, რუსეთსა და დასავლეთს შორის უახლოეს მომავალში მოლაპარაკებების შესაძლებლობა არ არსებობს და რუსეთი უკრაინაში მშვიდობისკენ არ ისწრაფვის. გერმანიის საგარეო დაზვერვის სამსახურის ხელმძღვანელის თქმით, არ არსებობს ოდნავი ნიშანი იმისა, რომ პუტინმა როგორღაც შეიცვალა აზროვნება და სურვილი, ბოლომდე გააგრძელოს სამხედრო აგრესია უკრაინის წინააღმდეგ.

„სტამბოლში (რუსეთის დელეგაციის მიერ) გადმოცემული დოკუმენტი საუკეთესო დასტურია იმისა, რომ სინამდვილეში ისინი ჩვენგან კაპიტულაციას ითხოვენ და მეტს არაფერს“, - განაცხადა კალმა.