თელ-ავივის ბენ გურიონის აეროპორტში პირველი თვითმფრინავი დაეშვა, რომელმაც ქვეყნის დახურული საჰაერო სივრცის გამო საზღვარგარეთ ჩარჩენილი ისრაელელები სამშობლოში დააბრუნა, - ინფორმაციას BBC-ი ისრაელის ტრანსპორტის სამინისტროზე დაყრდნობით ავრცელებს.

„ოპერაცია „უსაფრთხო დაბრუნების“ ფარგლებში, ბენ-გურიონის აეროპორტში პირველი რეისი დაეშვა“, - განაცხადა ტრანსპორტის სამინისტრომ „ტელეგრამ“ არხზე გამოქვეყნებულ პოსტში.

უწყების ცნობით, ისრაელის ავიაკომპანია El Al-ის მიერ განხორციელებული ავიარეისით კვიპროსის ქალაქ ლარნაკაში მყოფი ისრაელის მოქალაქეები სამშობლოში დააბრუნა.

გავრცელებული ინფორმაციით, ისრაელის საჰაერო სივრცის დახურვის გამო სამშობლოში დაბრუნებას 100 000-დან 150 000-მდე ისრაელელი ვერ ახერხებს.

ტრანსპორტის მინისტრი მირივ რეგევი აცხადებს, რომ მათი მიზანია ყველა ისრაელელის რეპატრიაცია.