თელავში პოლიციელის მიერ დაჭრილი 65 წლის კაცი გარდაიცვალა. თავის არეში ცეცხლნასროლი ჭრილობით ლევან შამრელაშვილი თელავის რეფერალურ საავადმყოფოში ორი დღის განმავლობაში იყო მოთავსებული.

ექიმის თქმით, პაციენტი კომატოზურ მდგომარეობაში შეიყვანეს სტაციონარში, ჩაუტარდა შესაბამისი ოპერაცია, თუმცა მისი გადარჩენა ვერ მოხერხდა.

შემთხვევა სოფელ რუისპირში 25 ივნისს ღამით ერთ-ერთ რესტორანში მოხდა. თვითმხილველების თქმით, საპატრულო პოლიციის თანამშრომლის, ბიძინა გავარდაშვილის მხრიდან, რომელიც სტუმრად იმყოფებოდა, შემთხვევით გასროლილმა ტყვიამ, ჯერ რესტორნის მინა ჩაამსხვრია, შემდეგ კი სუფრასთან მყოფ შუახნის მამაკაცს, ლევან შამრელაშვილს მოხვდა.

ამ დროისთვის არსებული ინფორმაციით, მხარეებს შორის რაიმე სახის დაპირისპირება არ მომხდარა. შემთხვევის ადგილზე საგამოძიებო მოქმედებები უკვე ჩატარდა.

გამოძიება განზრახ მკვლელობის მცდელობის მუხლითაა დაწყებული.