აშშ-ის პენსილვანიის შტატში, პოლიციასა და შეიარაღებულ პირს შორის მომხდარი დაპირისპირების შედეგად, სამი სამართალდამცველი დაიღუპა და ორი მძიმედ დაიჭრა, - ინფორმაციას Reuters-ი ავრცელებს.

შტატის პოლიციის კომისრის, პოლკოვნიკი კრისტოფერ პარიზის თქმით, სროლა სამხრეთ-აღმოსავლეთ პენსილვანიაში, იორკის ოლქში მოხდა, როდესაც პოლიციელები, ერთ-ერთ საქმეზე მიმდინარე გამოძიების ფარგლებში, თავიანთ მოვალეობას ასრულებდნენ.

„ისინი იქ გუშინ დაწყებული გამოძიების გასაგრძელებლად იმყოფებოდნენ“, - განუცხადა მან ჟურნალისტებს, თუმცა გარემოებების დაზუსტებისგან თავი შეიკავა.

ადგილობრივი მედიის ცნობით, შეიარაღებულმა პირმა პოლიციელებს ცეცხლი მაშინ გაუხსნა, როდესაც ისინი ჩხრეკის ორდერის აღსრულებას ცდილობდნენ.

შტატის პოლიციის კომისრის თქმით, შეიარაღებული პირი პოლიციის მიერ გახსნილი საპასუხო ცეცხლის შედეგად გარდაიცვალა. მისი ვინაობა, ამ დრომდე, საჯაროდ არ გახმაურებულა.