პოლონეთის პრემიერ-მინისტრის, დონალდ ტუსკის განცხადებით, პოლონეთი უყოყმანოდ ჩამოაგდებს ნებისმიერ ობიექტს, რომელიც ქვეყნის საჰაერო სივრცეს დაარღვევს.

„ჩვენ მივიღებთ გადაწყვეტილებას, ჩამოვაგდოთ მფრინავი ობიექტები, როდესაც ისინი დაარღვევენ ჩვენს ტერიტორიას და იფრენენ პოლონეთის თავზე - ამაზე აბსოლუტურად არანაირი განხილვა არ მიმდინარეობს“, - განაცხადა ტუსკმა.

ამასთან, მისი თქმით, საჭიროა ფრთხილი მიდგომა, როდესაც სიტუაცია სრულად ნათელი არ არის.

„როდესაც საქმე გვაქვს სიტუაციებთან, რომლებიც სრულად ნათელი არ არის, როგორიცაა რუსული გამანადგურებლების ბოლოდროინდელი ფრენა Petrobaltic პლატფორმაზე - მაგრამ ყოველგვარი დარღვევის გარეშე, რადგან ეს არ არის ჩვენი ტერიტორიული წყლები - ნამდვილად საჭიროა ორჯერ დაფიქრება, სანამ გადაწყვეტილების მიღება მოხდება ქმედებებზე, რომლებმაც შეიძლება გამოიწვიოს კონფლიქტის ძალიან მწვავე ფაზა“, - დასძინა ტუსკმა.

მისივე თქმით, ასევე დარწმუნებული უნდა იყოს, რომ პოლონეთი მარტო არ იქნება, თუ კონფლიქტის ესკალაცია დაიწყება.

„ასევე აბსოლუტურად დარწმუნებული უნდა ვიყო... რომ ყველა მოკავშირე ამას ზუსტად ისე მოეპყრობა, როგორც ჩვენ“, - აღნიშნა ტუსკმა.