პოლონეთმა ბელარუსთან სასაზღვრო მოძრაობა ორ საკონტროლო-გამშვებ პუნქტზე განაახლა, თუმცა, თავის მოქალაქეებს მოუწოდა, დაუყოვნებლივ დატოვონ ქვეყანა.

ბელარუსში პოლონეთის საელჩოს მიერ გავრცელებულ განცხადებაშია ნათქვამი, რომ შინაგან საქმეთა მინისტრის ბრძანების საფუძველზე, პოლონეთ-ბელარუსის სასაზღვრო გადასასვლელებზე სასაზღვრო მოძრაობა 25 სექტემბრიდან აღდგა.

ამჟამად, სამგზავრო მოძრაობისთვის მხოლოდ ტერესპოლ-ბრესტის სასაზღვრო გამშვები პუნქტია გახსნილი, სატვირთო გადაზიდვებისთვის კი - კოროშჩინ-კოზლოვიჩის.

ამასთან, საელჩოში აცხადებენ, რომ მზარდი დაძაბულობის, რეგიონში სამხედრო მოვლენების და პოლონეთის მოქალაქეების თვითნებური დაპატიმრებების შემთხვევების გამო, პოლონეთის საგარეო საქმეთა სამინისტრო ქვეყნის მოქალაქეებს ბელარუსში მოგზაურობას არ ურჩევს.

„უსაფრთხოების მდგომარეობის მკვეთრი გაუარესების, საზღვრების დახურვის ან სხვა გაუთვალისწინებელი გარემოებების შემთხვევაში, ევაკუაცია შესაძლოა მნიშვნელოვნად გართულდეს ან შეუძლებელიც კი გახდეს. საგარეო საქმეთა სამინისტრო მოუწოდებს ბელარუსის რესპუბლიკაში ამჟამად მყოფ პოლონეთის მოქალაქეებს, დაუყოვნებლივ დატოვონ ქვეყანა არსებული კომერციული და კერძო საშუალებებით“, - ნათქვამია საელჩოს განცხადებაში.

ცნობისთვის, 12 სექტემბრიდან პოლონეთსა და ბელარუსს შორის ყველა სასაზღვრო გამშვები პუნქტი დაკეტილია. რუსეთ-ბელარუსული სამხედრო წვრთნების „ზაპად-2025“ გამო, სასაზღვრო მოძრაობა ორივე მიმართულებით -პოლონეთიდან ბელარუსში და პირიქით - შეჩერდა.