ჯერ, თვითონ როგორც თქვეს, სამთავრობო „ჩეკისტი“ ძალოვანი სტრუქტურების კურატორი უნდა გამოსულიყო - ახლა, საბოლოოდ, ყველაფერი „დაჯდა“, რომ იქნება ბატონი კობახიძის მდივან- რეფერენტი, რომელიც დაეხმარება ძალოვნებთან ლაპარაკში,- ამის შესახებ „ლელო-ძლიერი“ საქართველოს აღმასრულებელმა მდივანმა თაზო დათუნაშვილმა მამუკა მდინარაძის სამართალდამცავი ორგანოების კოორდინაციის საკითხებში სახელმწიფო მინისტრის თანამდებობაზე დანიშვნასთან დაკავშირებით განაცხადა.

დათუნაშვილის თქმით, კობახიძე ალბათ თავად მარტივად ვერ ელაპარაკება ძალოვანი სტრუქტურების წარმომადგენლებს, „საკუთარი ტიპაჟიდან გამომდინარე“.

„ჯერ, თვითონ როგორც თქვეს, სამთავრობო „ჩეკისტი“უნდა გამოსულიყო ძალოვანი სტრუქტურების კურატორი. მერე, ფუნქციებიდან გამომდინარე, რაც დავასკვენით, კურიერის ფუნქცია უნდა შეესრულებინა თამაზაშვილსა და გელაძეს შორის, თავის ორ მეგობარს შორის უნდა ეკურიერა და ახლა, საბოლოოდ, ყველაფერი „დაჯდა“, რომ იქნება ბატონი კობახიძის მდივან- რეფერენტი. ალბათ, კობახიძეს ასე უნდა, რომ ჰყავდეს ახალი მდივან-რეფერენტი, რომელიც დაეხმარება ძალოვნებთან ლაპარაკში. გამომდინარე კობახიძის ტიპაჟიდან, ალბათ, ძალოვნებს ვერ ელაპარაკება მარტივად და მდივან-რეფერენტი ამაში დასჭირდება“, - განაცხადა დათუნაშვილმა.

ცნობისთვის, პრემიერ-მინისტრ ირაკლი კობახიძის განცხადებით, მთავრობის სტრუქტურას დაემატება სამართალდამცავი ორგანოების კოორდინაციის საკითხებში სახელმწიფო მინისტრის თანამდებობა, რომელსაც მამუკა მდინარაძე დაიკავებს. ამასთან, საქართველოს სახელმწიფო უსაფრთხოების სამსახურის უფროსის თანამდებობაზე საქართველოს პარლამენტს გელა გელაძის კანდიდატურა წარედგინება, ხოლო შინაგან საქმეთა მინისტრად აჭარის ა/რ მთავრობის თავმჯდომარე სულხან თამაზაშვილი დაინიშნა.