”მაესტროს” წილების საქმეზე სასამართლო გადაწყვეტილებას 18 აპრილს გამოიტანს. სასამართლომ სადაო წილებთან დაკავშირებით, როგორც მოსარჩელე მამუკა ღლონტისა და ეკატერინე აკობიას, ასევე მოპასუხე მხარის გია გაჩეჩილაძის პოზიციები და არგუმენტები მოისმინა. მოსამართლემ ასევე არ დააკმაყოფილა მოსარჩელე მხარის შუამდგომლობა საქმეზე მოწმის სახით, ბიძინა ივანიშვილის, ივანე ჩხარტიშვილისა და გია ხუხაშვილის დაკითხვის თაობაზე. მოსარჩელე მხარის მტკიცებით, აღნიშნული პირები დაადასტურებდნენ, რომ გია გაჩეჩილაძემ მისი კუთვნილი წილების სანაცვლოდ, კონკრეტული თანხა მიიღო.

სასამართლო დავა ეხება შპს ”სტუდია მაესტროში”გია გაჩეჩილაძის წილების 10%-ს, რომელიც 2011 წელს გაჩეჩილაძემ, ”მაესტროში” განვითარებული ცნობილი მოვლენების დროს, ბაჩო კიკაბიძეს მართვისა და განკარგვის უფლებით გადასცა, თუმცა წილებზე დადებული ყადაღის გამო, შეთანხმების ოფიციალურად გაფორმება და რეესტრში გატარება ვერ მოხერხდა.