ქუთაისის საკრებულოს დეპუტატი ლაშა გვენეტაძე, რომელიც საპატიმროში სასჯელს ადამიანის ცემის გამო იხდიდა, ვადაზე ადრე, პირობით გათავისუფლდა.

"მოსჯილი მქონდა ცხრა თვე სასჯელის პენიტენციურ დაწესებულებაში მოხდით. მოქმედი კანონმდებლობით, 2/3 -ის გასვლის შემდეგ პატიმრის საქმეს განიხილავს ვადაზე ადრე პირობით გათავისუფლების კომისია. ჩემი საქმეც განიხილეს და მიიღეს დამაკმაყოფილებელი გადაწყვეტილება და ვადაზე ადრე გამათავისუფლეს. უნდა მომეხადა ცხრა თვე და რეალურად, მოვიხადე თითქმის შვიდი თვე“,- განუცხადა „ინტერპრესნიუსს“ ლაშა გვენეტაძემ.

ლაშა გვენეტაძის წინააღმდეგ საქმე სსკ 143-ე მუხლის მე-3 ა და ე ქვეპუნქტით მიმდინარეობდა, რაც სიცოცხლისთვის და ჯანმრთელობისთვის საშიშ ძალადობას გულისხმობს. დაკავებულს ბრალად იმ პირის ცემა ედებოდა, რომელმაც, გვენეტაძის ინფორმაციით, მისი მამის საფლავი გაძარცვა.