გიორგი გახარია ოპოზიციას - როდესაც ადამიანი პირადი ტრაგედიიდან გამომდინარე იძულებულია მიმართოს უკიდურეს ზომებს, თქვენ ამისგან აკეთებთ სპექტაკლს
როდესაც ადამიანი პირადი ტრაგედიიდან გამომდინარე იძულებულია მიმართოს უკიდურეს ზომებს, იმის მაგივრად, რომ მოქალაქის სტატუსიდან გამომდინარე, მას გვერდით დაუდგეთ, ამისგან აკეთებთ სპექტაკლს, - ასე მიმართა საპარლამენტო ოპოზიციას შინაგან საქმეთა მინისტრმა გიორგი გახარიამ, რითაც უპასუხა „ევროპული საქართველოს“ წევრის ირაკლი აბესაძის კითხვას ზაზა სარალიძესთან დაკავშირებით.
„ირაკლი აბესაძეს ჰქონდა გამჭრიახი შეკითხვა - ბიძინა ივანიშვილმა პოლიტიკურად მოტივირებული დაარქვა სარალიძის ქმედებასო და ეთანხმებით ამას თუ არაო. ძალიან ჩამჭრელი შეკითხვა გაქვთ. რეალურად, სამწუხაროდ, ის კი არ იყო პოლიტიკურად მოტივირებული, რომ ზაზა სარალიძეს მოუწია კარავში ყოფნა, სამწუხარო ისაა, რომ თქვენ იგებდით ამას პოლიტიკურად. პოლიტიკურად მოტივირებული ხართ თქვენ. ფაქტი შემდეგშია, როდესაც ადამიანი პირადი ტრაგედიიდან გამომდინარე იძულებულია მიმართოს უკიდურეს ზომებს თქვენ, იმის მაგივრად, რომ მოქალაქის სტატუსიდან გამომდინარე, მას უბრალოდ გვერდით დაუდგეთ, ამისგან აკეთებთ სპექტაკლს. თქვენ ვერც ერთ შემთხვევაში ვერ იქნებით ჩემზე უფრო დაინტერესებული, რომ ეს საქმე დასრულდეს“, - განაცხადა გიორგი გახარიამ.
