ანა ნაცვლიშვილი მიხეილ ჩხენკელის გიორგი ამილახვარით შესაძლო ჩანაცვლებაზე - შესაკრებთა გადაადგილებით ჯამი არ იცვლება - სანამ ჭადრაკის ფიგურებს ცვლის და აადგილებს ოლიგარქი, პრობლემა რჩება იგივე

დეპუტატები და მინისტრები არიან ჭადრაკის დაფაზე ივანიშვილის მიერ დადებული ფიგურები, რომლებსაც ნებისმიერ დროს ააყირავებს, გადააადგილებს, გადააგდებს ან ნაგვის ყუთიდან ამოიღებს და თავიდან დადებს ჭადრაკის დაფაზე, - ამის შესახებ ჟურნალისტებთან „ლელოს“ დეპუტატმა ანა ნაცვლიშვილმა განაცხადა, რითაც განათლების მინისტრის პოსტზე მიხეილ ჩხენკელის გიორგი ამილახვარით ჩანაცვლების თაობაზე გავრცელებულ ინფორმაციას გამოეხმაურა.

მისი თქმით, „ქართულმა ოცნებამ“ მინისტრის ჩანაცვლება გადაწყვიტა არა განათლების სისტემაში არსებული უმწვავესი პრობლემების გამო, არამედ იმის გამო, რომ „დარდობს, როგორ შეინარჩუნოს საკუთარი ძალაუფლება“ და სწორედ ძალაუფლების შესანარჩუნებლად დგამს ნაბიჯებს.

„შესაკრებთა გადაადგილებით ჯამი არ იცვლება. მანამ სანამ ჭადრაკის ფიგურებს ცვლის და აადგილებს ოლიგარქი, ჯამი ანუ პრობლემა რჩება იგივე. მთელი ამ ათი წლის მანძილზე და განსაკუთრებით რუსულ კანონთან დაკავშირებით განვითარებულმა მოვლენებმა ძალიან ნათლად დაგვანახა, რომ დეპუტატები თუ მინისტრები არიან ჭადრაკის დაფაზე ივანიშვილის მიერ დადებული ფიგურები, რომლებსაც ნებისმიერ დროს ააყირავებს, გადააადგილებს, ჩაანაცვლებს, გადააგდებს ან ნაგვის ყუთიდან ამოიღებს და თავიდან დადებს ჭადრაკის დაფაზე. ამიტომ მთავარი პრობლემა არის ის, ვინც მართავს არაფორმალურად, არაკონსტიტუციურად, რუსული მეთოდებით და ცდილობს ამ ქვეყანას დააკარგვინოს დემოკრატიული, თავისუფალი განვითარების გზა. ეს არის პრობლემა, რომლის დასასრულებლადაც უნდა მივმართოთ ძალისხმევა,“ - განაცხადა ნაცვლიშვილმა.