პარლამენტის თავმჯდომარე ინტერრელიგიურ სათათბიროს შეხვდა

საქართველოს პარლამენტის თავმჯდომარე შალვა პაპუაშვილი „ოჯახურ ღირებულებათა და არასრულწლოვანთა დაცვის შესახებ“ საქართველოს კონსტიტუციური კანონის პროექტის საყოველთაო-სახალხო განხილვის კომისიის სხდომის ფორმატში, რელიგიის საკითხთა სახელმწიფო სააგენტოს თავმჯდომარეს, ზაზა ვაშაყმაძესა და ინტერელიგიური სათათბიროს წარმომადგენლებს შეხვდა.

რელიგიის საკითხთა სახელმწიფო სააგენტოს ინფორმაციით, შალვა პაპუაშვილმა აღნიშნა, რომ საპარლამენტო უმრავლესობამ ერთი თვის წინ „საქართველოს კონსტიტუციაში ცვლილების შეტანის შესახებ“ და „ოჯახურ ღირებულებათა და არასრულწლოვანთა დაცვის შესახებ“ საქართველოს კონსტიტუციური კანონპროექტები დააინიციირა. მისი თქმით, კონსტიტუციური კანონის პროექტი ეხება ქვეყნის მოწყობის და საზოგადოების თანაცხოვრების პრინციპულ საკითხებს ამიტომ, პარლამენტი ვალდებულია განხილვამდე აზრი ჰკითხოს საზოგადოებას. „საყოველთაო-სახალხო განხილვის საორგანიზაციო კომისიამ 17 აპრილიდან მოყოლებული საქართველოს სხვადასხვა რეგიონში 10 შეხვედრა გამართა, 5 ათასამდე ადამიანს შევხვდით. ამ ცვლილებებს ყველგან ძალიან დიდი მოწონებით და მხარდაჭერით შეხვდნენ“ - განაცხადა პარლამენტის თავმჯდომარემ.

„საკონსტიტუციო ცვლილებების მნიშვნელობაზე ისაუბრეს საპარლამენტო უმრავლესობის წევრებმა: ირაკლი ქადაგიშვილმა, დავით მათიკაშვილმა და თენგიზ შარმანაშვილმა.

საქართველოს სამოციქულო ავტოკეფალიური მართლმადიდებელი ეკლესიის, საქართველოს მუსლიმთა სამმართველოს, საქართველოს ებრაელთა კავშირის, სომეხთა სამოციქულო ეკლესიის საქართველოს ეპარქიის, ლათინ კათოლიკეთა კავკასიის სამოციქულო ადმინისტრაციის, საქართველოს ქრისტიან-ბაპტისტთა ეკლესიების გაერთიანების, იეზიდთა სასულიერო საბჭოს წარმომადგენლებმა სრული მხარდაჭერა გამოხატეს კანონპროექტის მიმართ.

დღევანდელ შეხვედრამდე, ინტერრელიგიური სათათბიროს წევრები, რელიგიის სააგენტოს ინიციატივით, საქართველოს მთავრობის ადმინისტრაციაში შეიკრიბნენ და ერთხმად აღნიშნეს, რომ მათი რელიგიური მრწამსისთვის ოჯახი არის მხოლოდ ქალისა და მამაკაცის ერთობა, ოჯახს მათ ღირებულებათა სისტემაში უმნიშვნელოვანესი ადგილი უკავია, ხოლო საკუთარი შეხედულებების საფუძვლად ისინი მიიჩნევენ რელიგიურ სწავლებას“, - ნათქვამია სააგენტოს გავრცელებულ ინფორმაციაში.

დავით გოჩავა - ახლა ჩინეთმა თუნდაც „ჰონგ-კონგის პორტი“ ჩადგას ანაკლიაში, აზრი არ აქვს არაფერს - ევროპა „ანაკლიის პორტთან“, სავარაუდოდ, არ ითანამშრომლებს
ქართული პრესის მიმოხილვა 13.06.2024
„არქიმ“ და „დელოიტმა“ აუდიტის მომსახურების ხელშეკრულება გააფორმეს
ზაფხულის ყველაზე ცხელი შემოთავაზება HONOR-ისგან - დაიწყე ახალი სეზონი ახალ სმარტფონთან ერთად
Skillwill-ი კემბრიჯის უნივერსიტეტთან თანამშრომლობას იწყებს
„მოირგე დრო“ -  დეველოპერული კომპანია „ბიოგრაფი ლივინგის“ ახალი საკომუნიკაციო კამპანია
ისრაელის ელჩი ჰადას მეიცადი - ის, ვინც იწყებს ომს და შემდეგ აგებს, არ არის მსხვერპლი