ლიეტუვის ყოფილი საგარეო საქმეთა მინისტრი და ლიეტუვის ამჟამინდელი ელჩი შვედეთში ლინას ლინკევიჩუსი მიიჩნევს, რომ საქართველოს ხელისუფლება გულწრფელი არ არის, როდესაც ამბობს, რომ ევროპისკენ სვლა სურს. საქართველოში მიმდინარე ორდღიანი კონფერენციის „გარდამტეხი წელი“ ფარგლებში, „ინტერპრესნიუსისთვის" მიცემულ ინტერვიუში, ლინკევუჩუსი უფრო შორსაც წავიდა და აღნიშნა, რომ იმას, რასაც საქართველოს ამჟამინდელი ხელისუფლება აკეთებს, არაფერი აქვს საერთო არც ევროკავშირთან და არც მის ღირებულებებთან.

ამ შეფასებების ფონზე, როგორ აღიქვამს საქართველოს შანსებს ევროკავშირში წევრობასთან დაკავშირებით, რა მიზეზებს ხედავს „ქართული ოცნების“ რიტორიკის უკან და როგორ აფასებს ბიძინა ივანიშვილის პოლიტიკურ როლს, ვრცლად ინტერვიუში...

- პირველ რიგში მსურს გკითხოთ, რა პერსპექტივები აქვს საქართველოს ევროკავშირში წევრობის თვალსაზრისით?

- როდესაც საქართველოს მიენიჭა კანდიდატის სტატუსი, ეს არ მომხდარა ხელისუფლების მიღწევების წყალობით, არამედ ეს მოხდა ქართველი ხალხისა და სამოქალაქო საზოგადოების გამო. ევროკავშირში და ზოგადად, ევროპაში, ვიფიქრეთ, რომ არ უნდა მიგვეტოვებინა ეს ხალხი და უნდა ყოფილიყო რაღაც სიგნალი. მაგრამ იმის გათვალისწინებით, რომ საქართველოს ხელისუფლების ქმედებები საერთოდ არ არის შესაბამისობაში ევროკავშირის ღირებულებებთან, გაწევრიანების პროცესის შემდგომი ეტაპი არ იქნება რეალისტური. ეს ჩემი პირადი შეხედულებაა. ცხადია, არ შემიძლია ყველას ნაცვლად საუბარი. ადამიანებმა, რომლებსაც სჯერათ საქართველოს გზის ევროპისა და ევროატლანტიკური საზოგადოებისკენ, არჩევანი უნდა გააკეთონ. ხელისუფლება ახლა კრძალავს ოპოზიციურ პარტიებს, ახდენს უცხოური აგენტების შესახებ უცნაური კანონის იმპლემენტაციას - ამას არაფერი აქვს საერთო ევროპულ ღირებულებებთან.

- რა მიზეზებს ხედავთ ამ შეცვლილი რიტორიკის უკან, თუ რა თქმა უნდა, ფიქრობთ, რომ დროთა განმავლობაში „ქართულმა ოცნებამ“ რიტორიკა შეცვალა? როგორ ფიქრობთ, რატომ დაიწყეს მათ პარტნიორებზე გამძაფრებული თავდასხმა, სწორედ მაშინ, როდესაც მოგვეცა შესაძლებლობა ამ გაერთიანებების წევრი გავმხდარიყავით?

- ჩემთვის ეს საკითხი მისტიკურია. გულწრფელად რომ გითხრათ, საკუთარ თავს საქართველოს შიდა პოლიტიკის ექსპერტად არ მივიჩნევ, თუმცა ივანიშვილს შევხვდი რამდენჯერმე, ვისაუბრეთ სხვადასხვა საკითხზე და ჩემი შეგრძნებით, ის არ იყო პრორუსი, ჩემი შეგრძნება იყო, რომ ის არის პრობიძინისტი. მაგრამ, ამავდროულად, მჯერა და ვიმედოვნებ, რომ ის საქართველოს პატრიოტია. უნდა იყოს. სხვაგვარად ვერ წარმომიდგენია. მაგრამ ის, რასაც ახლა პარტია აკეთებს, ეს ეწინააღმდეგება ქვეყნის ინტერესებს, სტრატეგიას. კითხვა, „რატომ“, ჩემთვის ძალიან რთულად პასუხგასაცემია. არ მაქვს არავითარი ლოგიკა. თუ საქმე ფულს ეხება, ამ ადამიანებს, რომლებიც ხელისუფლებაში არიან, საკმარისი ფული აქვთ. დამატებითი ფული?! ცხადია, ფული საკმარისი არასდროს არის, თუმცა არ მგონია ეს განხილვის საგანი იყოს. ვფიქრობ, ეს ნამდვილად გარდამტეხი მომენტია, გარდამტეხი წელია - ამაში ვეთანხმები იმ ექსპერტებს, რომლებიც ვითარებას აკვირდებიან და ამ წელს სწორედ ასე აფასებენ. ჯერ კიდევ ვიმედოვნებ, რომ ქართულ საზოგადოებას, განსაკუთრებით, პოლიტიკურ პარტიებს, ექნებათ მობილიზების შესაძლებლობა ამ ძალიან გადამწყვეტ ბრძოლაში დემოკრატიისთვის. მათ შეუძლიათ, გაიყონ კვლავ ამის შემდეგ, გასაგები იქნება, ვიცი მათი განსხვავებების შესახებ და რომ ებრძვიან ერთმანეთს, რომ არასდროს კონსოლიდირდებიან, მაგრამ ახლა დროა, რომ ეს ყველაფერი დავიწყებულ იქნას საკუთარი პარტიული ინტერესის ხარჯზე, იმის უზრუნველსაყოფად, რომ საქართველო გააგრძელებს თავის გზას ევროატლანტიკური ინტეგრაციისკენ, რაც განისაზღვრა დიდი ხნის წინ. ვინ ვარ მე, რომ რჩევები მივცე, მაგრამ ეს არის, რისი თქმაც მსურს, რადგან მიუკერძოებელი არ ვარ ამ საკითხში, არ შემიძლია იმის ყურება, როგორ ნადგურდება ყველაფერი ჩვენს თვალწინ, რაც ამდენი წლის განმავლობაში შენდებოდა.

- თქვენ აღნიშნეთ რამდენიმე საკანონმდებლო ცვლილება, რომელიც, თქვენი თქმით, პრობლემურია. როგორ ხედავთ ამ უკვე მიღებული „პრობლემური კანონმდებლობის“ ფონზე ვითარების შემობრუნებას?

- შეცვალეთ კანონმდებლობა! ჩვენს მაგალითზე რომ გითხრათ. როდესაც ჩვენ ვახდენდით ნატო-სა და ევროკავშირში ინტეგრაციას, დამიჯერეთ, რომ დასავლეთის მხრიდან მაშინაც არ იყო დიდი ენთუზიაზმი. რამდენიმე წლის განმავლობაში მე პირადად ვიყავი ნატო-ში და მახსოვს როგორ მეუბნებოდნენ მომავალი მოკავშირეები: „თქვენ არასდროს იქნებით წევრები“. ეს ძალიან ბევრჯერ ითქვა და ამ პირობებში, მოტივაციის შენარჩუნება ძალიან რთული იყო ჩვენთვის. მაგრამ ჩვენ ვცდილობდით მივყოლოდით ჩვენი მომავალი მოკავშირეების რჩევას და თუ მომავალი მოკავშირეები გვეუბნებოდნენ, რომ ჩვენ უნდა გაგვეტარებინა გარკვეული რეფორმები, ჩვენ ვახდენდით ამ რეფორმების იმპლემენტაციას, რადგან გვსურდა კლუბს მივერთებოდით. საქართველო ამის საწინააღმდეგოდ იქცევა. ბევრი მეგობარი ეუბნება მას: ეს არ გააკეთო! არ მიიღო უცხოური აგენტების შესახებ კანონი! არა, ეს მაინც გაკეთდა ყველაფრის მიუხედავად. აქედან გამომდინარე, ჩემთვის ეს სიგნალია, რომ ხელისუფლება გულწრფელი არ არის, როდესაც ამბობს, რომ სურს ევროპისკენ სვლა. არა, ისინი არ მიდიან ევროპაში, ისინი სადღაც სხვაგან მიდიან და ხალხს ეს უნდა ესმოდეს. მე უბრალოდ გთავაზობთ ჩვენი დამოკიდებულებისა და აღქმების შედარებას იმასთან, რაც ხდება ახლა საქართველოში.

- მსურს კითხვა ამგვარად დაგისვათ, ვითარების შემობრუნება ქართველ ხალხზეა დამოკიდებული თუ ევროკავშირსა და მაგალითად ამერიკის შეერთებულ შტატებს აქვთ შესაბამისი ბერკეტები? მაგალითად, არის საუბარი სანქციებთან დაკავშირებით, მათ შორის, ინდივიდუალურ ფინანსურ სანქციებთან დაკავშირებით. ფიქრობთ, რომ მსგავსი ნაბიჯების გადადგმა აუცილებელია?

- რა თქმა უნდა, ამ ყველაფერს სანქციები მოჰყვება და იქნება სანქციები, ინდივიდუალურიც, კოლექტიურიც, ევროკავშირის მიერ დაწესებული და შეერთებული შტატების მიერ დაწესებული, მაგრამ ეს არ შეცვლის ვითარებას საქართველოში, რადგან საქართველოში ვითარების შეცვლა შესაძლებელია მხოლოდ ქართველი ხალხის მიერ. ცხადია, რომ ჩვენ შეგვიძლია გარკვეული ნაბიჯების გადადგმა, მაგრამ ეს არ იქნება გადამწყვეტი.

- თქვენ მიერ წარმოდგენილი მსჯელობის გათვალისწინებით, გჯერათ, რომ „ქართული ოცნების“ ხელისუფლება არის ის ხელისუფლება, რომელიც შეძლებს საქართველოს წაყვანას ევროკავშირში წარმატებით გაწევრიანებისკენ?

- არის თუ არა ეს სწორი ხელისუფლება ამ ამოცანის შესასრულებლად, ქართველი ხალხის გადასაწყვეტია, მაგრამ შემიძლია გითხრათ, რომ იმას, რასაც ისინი აკეთებენ, არაფერი აქვს საერთო ევროკავშირის ღირებულებებთან და ზოგადად ევროკავშირთან.

სალომე აბულაშვილი

„ინტერპრესნიუსი“