ისინი იქ [საკონსტიტუციო სასამართლოში] არიან იმიტომ, რომ მოემსახურონ ბიძინა ივანიშვილს, - ამის შესახებ არასამთავრობო ორგანიზაცია „საერთაშორისო გამჭვირვალობა - საქართველოს“ აღმასრულებელმა დირექტორმა, ეკა გიგაურმა განაცხადა, რითაც გამოეხმაურა საკონსტიტუციო სასამართლოს გადაწყვეტილებას, რომ 26 ოქტომბრის არჩევნების არაკონსტიტუციურად ცნობის შესახებ პრეზიდენტის და 30 პოლიტიკოსის კონსტიტუციური სარჩელები არსებით განსახილველად არ მიეღო.

მისივე თქმით, საკონსტიტუციო სასამართლოს მოსამართლეები ბიძინა ივანიშვილისგან იღებენ ინსტრუქციებს, დავალებებს, რომელსაც ასრულებენ.

„რა თქმა უნდა, ისინი იქ [საკონსტიტუციო სასამართლოში] არიან იმიტომ, რომ მოემსახურონ ბიძინა ივანიშვილს. არ ვსაუბრობ საკონსტიტუციო სასამართლოს ყველა მოსამართლეზე, ცხადია, რამდენიმე მოსამართლე არის, რომელიც იბრძვის შიგნიდან, მაგრამ მათი რაოდენობა საკმარისი არ არის.

ჩვენ უნდა გვახსოვდეს, რომ ყველაფერზე არის პასუხისმგებელი ბიძინა ივანიშვილი. ეს ადამიანები მას ემსახურებიან და მის ინსტრუქციებს, დავალებებს ასრულებენ. ეს არის მთავარი.

უნდა გვახსოვდეს, რომ ყველა ამ უბედურებაზე არის პასუხისმგებელი ერთი ადამიანი და ეს არ უნდა დაგვავიწყდეს”, - განაცხადა გიგაურმა.