ზოგი უცხოელის მხრიდან ვხედავდით კრიტიკას „ქართული ოცნების“ კამპანიაზე და აბსოლუტური სიჩუმეა, როდესაც ზიზღის და ძალადობის კამპანიას ვხედავთ ოპოზიციისგან - ფრონტია შეკრული ადგილობრივ დამკვირვებლებსა და ოპოზიციას შორის იმისთვის, რომ „ქართული ოცნებისთვის“ არათანაბარი პირობები შექმნან, - ამის შესახებ საქართველოს პარლამენტის თავმჯდომარემ, შალვა პაპუაშვილმა დასმული კითხვის საპასუხოდ განაცხადა.
კერძოდ, აღნიშნულით მან უპასუხა კითხვას, როგორ შეაფასებს „ნაციონალური მოძრაობის“ ბანერებს, სადაც აღნიშნულია: „აირჩიე ერთიანობა მოიშორე „ქართული ოცნება“.
როგორც პაპუაშვილმა განმარტა, „ქართული ოცნების“ მხარდამჭერები ბრაზდებიან, როდესაც ხედავენ, რომ უცხოეთიდან დაფინანსებული ორგანიზაციები თვალს ხუჭავენ დარღვევებზე, რომელიც „ქართული ოცნების“ წინააღმდეგ ხდება.
„ესეც პირის შეკვრის შედეგია, რაც ოპოზიციას და არასამთავრობო ორგანიზაციებს შორის ხდება, როდესაც პირდაპირ ზიზღის კამპანიაა წამოწყებული „ქართული ოცნების“ წინააღმდეგ. ბანერი ერთ-ერთი გამოხატულებაა. ნული რეაგირება არის არასამთავრობო ორგანიზაციების და დამკვირვებლებისგან. გვახსოვს უცხოელების განცხადებები ჩვენს კამპანიასთან დაკავშირებით, ვხედავთ, რომ ჩუმად არიან „ნაცმოძრაობასთან“ დაკავშირებით. ეს კიდევ ერთხელ აჩვენებს, რატომ არ შეიძლება უცხოელი აქტიური იყოს არჩევნებში.
ზოგი უცხოელის მხრიდან ვხედავდით კრიტიკას „ქართული ოცნების“ კამპანიაზე და აბსოლუტური სიჩუმეა, როდესაც ზიზღის და ძალადობის კამპანიას ვხედავთ ოპოზიციისგან იქნება ეს ბანერები თუ მივარდნები. ამ ზიზღის კამპანიის გამო გარდაიცვალა ჩვენი ერთ-ერთი მხარდამჭერი. არავინ ამოიღო ხმა. საია-მ ისიც კი არ იკადრა, რომ ანგარიშში ჩაეწერა, უარი თქვეს ადგილობრივმა დამკვირვებლებმა ასახვაზე.
ფრონტია შეკრული ადგილობრივ დამკვირვებლებსა და ოპოზიციას შორის იმისთვის, რომ „ქართული ოცნებისთვის“ არათანაბარი პირობები შექმნან. კვლევებიც ძალიან კარგად აჩვენებს, რომ ქართველი ხალხი კიდევ უფრო ბრაზდება, როცა ხედავს, რომ უცხოელები ხელებს აფათურებენ ჩვენს პოლიტიკაში და ფიქრობენ, რომ მათი მითითებებით უნდა მიიღოს ხალხმა გადაწყვეტილება. ხალხი ბრაზდება, როდესაც ხედავენ, რომ უცხოეთიდან დაფინანსებული ორგანიზაციები თვალს ხუჭავენ დარღვევებზე, რომელიც „ქართული ოცნების" წინააღმდეგ ხდება, ეს აბრაზებს ჩვენს ამომრჩეველს. ამას არჩევნებში გამოხატავენ „ქართული ოცნების“ მხარდაჭერით“,- აღნიშნა პაპუაშვილმა.
ჟურნალისტის კითხვაზე, მზად არის თუ არა „ქართული ოცნება“ არჩევნების შედეგებიდან გამომდინარე, ხელისუფლების მშვიდობიანი გადაბარებისთვის, შალვა პაპუაშვილმა განაცხადა, რომ საზოგადოება პოლიტიკურ ძალას, რომელიც საზოგადოების დაკვეთით არ მოქმედებს, მხარს არ დაუჭერს.
"ხედავთ კვლევის შედეგებს, ხედავთ თუ როგორია ადამიანების განწყობები, რა თქმა უნდა, წარმოუდგენელია, რომ ქართველმა ხალხმა მხარი დაუჭიროს იმ პოლიტიკურ კონგლომერატს, რომელიც ამბობს, რომ ქართველი ხალხის დაკვეთით კი არ იმოქმედებს, არამედ უცხოელების ნება-სურვილის განმახორციელებელი იქნება. მაშინ ეს ქვეყანა უნდა დავხუროთ და დავიშალოთ. თუკი ფიქრობთ, რომ ქართველი ხალხი მხარს დაუჭერს და მანდატს მისცემს იმ ძალებს, რომლებიც ამბობენ, რომ უცხო ქვეყნებისა და უცხო ძალების დაკვეთით იმოქმედებენ, რაღაზეა საუბარი? გონივრულობის რაღაც ზღვარი და ჩარჩოები არსებობს. თეორიულ დაშვებებზე კი არ არის, არამედ გონივრულობაზეა საუბარი, ვხედავთ კვლევები რა არის, ხალხის განწყობა რა არის“,- განაცხადა შალვა პაპუაშვილმა.
ბოლო საინფორმაციო გამოშვება
