ხაზგასმით ითქვა, რომ საქართველო მსოფლიო ეკონომიკაში განვითარებულ ცვლილებებს ხვდება მომზადებული, რაც მნიშვნელოვანია ქვეყნის განვითარებისთვის, - ამის შესახებ ფინანსთა მინისტრმა, ლაშა ხუციშვილმა განაცხადა.
მისი თქმით, საერთაშორისო სავალუტო ფონდსა და მსოფლიო ბანკში გამართულ შეხვედრებზე აღინიშნა, საფინანსო ინსტიტუტებთან თანამშრომლობით საქართველოს მიერ განხორციელებული რეფორმები და ამ რეფორმის შედეგები, რომელიც „გამოიხატება მაღალ ეკონომიკურ ზრდაში“, რომელიც ქვეყანაში ფიქსირდება ბოლო ოთხი წლის განმავლობაში, რაც არა მხოლოდ რეგიონისთვის, არამედ მსოფლიოსთვის არის გამორჩეული, ასევეა, მაკროეკონომიკური თვალსაზრისით შექმნილი ხელსაყრელი პირობები.
„ბუნებრივია, ეს არის შედეგები იმ რეფორმებისა, რომელსაც ვახორციელებთ, მათ შორის, საერთაშორისო სავალუტო ფონდთან და მსოფლიო ბანკთან ერთად. განახლებული პროგნოზები, რომელიც საქართველოსთან მიმართებით წარმოადგინეს, სრულად ასახავს იმ რეალობას, რაც ქვეყანაშია ეკონომიკური განვითარების თვალსაზრისით. ეს მნიშვნელოვანია, მათ შორის, იმ ფაქტორის გათვალისწინებით, რომ სსფ-ის პროგნოზით მოლოდინია, რომ მსოფლიოში ეკონომიკური ზრდის მაჩვენებელი შემცირდება და შესაბამისად, ამ მიმართულებით გაურკვევლობა გარკვეულწილად იმატებს. თუმცა, ამ მდგომარეობას მსოფლიო ეკონომიკაში, საქართველო ხვდება ძალიან მყარი პოზიციითა და მაღალი ეკონომიკური ზრდით. ასევე, ბევრი ფინანსური ბუფერით, რომელიც ქვეყანას იცავს ყველანაირი ტიპის პრობლემებისგან. ეს ცალსახად იქნა ხაზგასმული თითოეულ შეხვედრაზე, რომ საქართველო მსოფლიო ეკონომიკაში განვითარებულ ცვლილებებს ხვდება ძალიან მომზადებული და ეს მიმართულება ძალიან მნიშვნელოვანია ქვეყნის განვითარებისთვის. ჩვენ, ასევე, შეხვედრები გვქონდა საინვესტიციო კომპანიებთან, საინვესტიციო ბანკების JP Morgan-სა და Bank of America-ს ორგანიზებით. დაფიქსირდა მაღალი ინტერესი საქართველოს ეკონომიკისადმი, გამოიკვეთა სექტორები, სადაც მაღალია ინტერესი ამერიკული კომპანიების მხრიდან. ესაა საფინანსო სექტორი, ლოგისტიკა ენერგეტიკის სექტორი, სადაც დაინტერესება ძალიან მაღალია იმისთვის, რომ ამერიკულმა კომპანიებმა ინვესტიციები განახორციელონ საქართველოში", - განაცხადა ფინანსთა მინისტრმა, ლაშა ხუციშვილმა, რომლის კომენტარსაც ფინანსთა სამინისტრო ავრცელებს.
ბოლო საინფორმაციო გამოშვება
