სუვერენიტეტის დათმობა არ ხდება - მავნებლობაა, როდესაც ასეთი ტიპის დეზინფორმაციას ავრცელებს ხელისუფლება, თითქოს, ჩვენს სუვერენიტეტს საფრთხე ემუქრება, - ამის შესახებ ოპოზიციონერმა დეპუტატმა, თამარ კორძაიამ ჟურნალისტებთან საუბრისას განაცხადა.
„სუვერენიტეტის დათმობა არ ხდება. ეს არის საერთაშორისო შეთანხმება, სადაც სახელმწიფოები ურთიერთვალდებულებებს და პასუხისმგებლობებს იღებენ და ეს ხდება სახელმწიფოს სუვერენული გადაწყვეტილების ფარგლებში. როდესაც ასეთი ტიპის დეზინფორმაციად ავრცელებს ხელისუფლება, თითქოს, ჩვენს სუვერენიტეტს ემუქრება საფრთხე, არის მავნებლობა. მაშინ რატომ საუბრობს ირაკლი კობახიძე და შალვა პაპუაშვილი, რომ ჩვენ აუცილებლად გავხდებით ევროკავშირის წევრი. მათ დაუსვით კითხვა: თმობენ სუვერენიტეტს?” - აღნიშნა კორძაიამ.
მან ასევე ისაუბრა 4 ქვეყნის საგარეო საქმეთა მინისტრის გუშინდელ აქციაზე მისვლასთან დაკავშირებით და განაცხადა, რომ „ისინი იდგნენ სწორ ადგილას და სწორ დროს“.
„რა თქმა უნდა, ტოტალიტარული სახელმწიფოს შემქმნელი პირველი პირები არ მოიწონებდნენ თავისუფლებისთვის მებრძოლი ადამიანების გვერდით დემოკრატიული სახელმწიფოს ლიდერების დგომას. არ გამკვირვებია მე მათგან ეს კომენტარები“,- აღნიშნა კორძაიამ.
ცნობისთვის, გუშინ, ლიეტუვის საგარეო საქმეთა მინისტრმა გაბრიელიუს ლანდსბერგისმა თბილისში გამართულ პრესკონფერენციაზე განაცხადა, რომ ევროკავშირი არავის არაფერს აიძულებს და ევროკავშირში ყოფნა სუვერენიტეტის ნაწილის დათმობას ნიშნავს.
ბოლო საინფორმაციო გამოშვება
